Nám í forskólanum
Jazzballettnám er fyrir alla
Danslistarskóli JSB sérhæfir sig í jazzballett.
Jazzballettnám er vinsælt og fjölbreytt dansnám sem hefur þróast á hátt í 60 ára starfsferli skólans. Jazzballettnám er tómstundamiðað og við allra hæfi.
Nám í forskólanum er góður undirbúningur fyrir jazzballettnám.
Námslýsing
Forskólanámið er skemmtilegt og þroskandi dansnám fyrir ung börn. Nemendur, jafnt stelpur sem strákar, eru teknir inn í forskólann frá 3 ára aldri. Engin sérstök inntökuskilyrði eru í forskólanámið.
Kennsluefni miðast við aldur og þroska nemenda. Dansgleði og hreyfifærni nemenda er virkjuð í gegnum dans og leiki.
Niðurröðun í hópa
Nemendum er skipt í hópa eftir aldri. Forskólanámið er fyrir öll börn á aldrinum 3-5 ára.
Kennslufyrirkomulag
Skólaárinu er skipt í haustönn og vorönn. Tímabilið miðast við skiptingu anna í grunnskólum.
Kennsla fer fram síðdegis og um helgar, þ.e. eftir hefðbundinn skólatíma. Kennt er 1x í viku í 45 mínútur í senn.
Dansþjálfunin
Eftirfarandi þættir liggja til grundvallar dansþjálfuninni:
- Samhæfing líkamshreyfinga
- Dansspuni og leikræn tjáning
- Tónskynjun og túlkun hreyfinga við tónlist
- Dansgleði og sjálfsöryggi
Markmið kennslu og hæfniviðmið
Í jazzballettnámi er lögð áhersla á dansgleði. Nemendur eru hvattir til dáða og örvaðir til framfara. Árangursmarkmið eru einstaklingsbundin, miðuð við aldur og þroska nemandans.
Sýningar og viðburðir
Hluti af skipulagi námsins er uppsetning danssýninga. Í lok hverrar annar eru haldar formlegar eða óformlegar sýningar þar sem nemendur fá þjálfun í miðlun og sviðsframkomu.
Í lok haustannar bjóða nemendur fjölskyldu og vinum á “opið hús” þar sem gestir fá innsýn í dansnámið og verkefni nemenda í hefðbundnum kennslustundum.
Allir nemendur skólans taka þátt í viðamikilli nemendasýningu í Borgarleikhúsinu á hverju vori. Í gegnum undirbúningsvinnu sýningar fá nemendur ómetanlega þjálfun í sviðsframkomu, tjáningu, samstarfi og félagslegri færni svo fátt eitt sé nefnt.
